काठमाडौं – नेपाली बजारमा भेस्पा र अप्रिलिया स्कुटर बिक्री–वितरण गरिरहेको दुगड ग्रुप अन्तर्गतको दुगड ब्रदर्स एन्ड सन्सबाट डिलरसिप खोसिएको छ । अब सो समूह यी दुई स्कुटर ब्रान्डको नेपालका लागि आधिकारिक बिक्रेता हुने छैन ।
पहिले डी–लाइफ स्टाइल आधिकारिक वितरक रहेकोमा दुगड ग्रुपले यी दुई ब्रान्डको डिलरसिप आफू मातहत ल्याएको थियो । तर हाल दुगड समूहबाट समेत यो ब्रान्ड खोसिएको छ ।
मोबाइल र अन्य व्यवसायमा संलग्न भिमसरिया ग्रुप अब यी दुई ब्रान्डको आधिकारिक वितरक भएको छ । सो समूहले समेत आफूहरु आधिकारिक वितरक तोकिएको पुष्टि गरेको छ ।
यो भन्दा पहिले रोयल इन्फिल्ड मोटरसाइकलको डिलरसिप पनि दुगड ग्रुपबाट त्रिवेणी ग्रुप अन्तर्गतको अल्फा अटोमोटिभले लिएको थियो ।
नेपाली बजारमा हाल भेस्पा र अप्रिलिया स्कुटर तुलनात्मक रुपमा राम्रै चलेको ब्रान्डमा पर्छन् । यद्यपि बजार व्यवस्थापन लगायतका कार्य सन्तोषजनक नभएको गुनासो भने सुनिने गरेको थियो ।
-Nepalauto