काठमाडौँ । काठमाडौँ महानगरपालिकाका मेयर बालेन्द्र साह (बालेन)ले नेपालका जुनसुकै स्थानीय तहका गरिब तथा असहायको निशुल्क उपचार गर्ने बताएका छन् ।
उनले आज बिहान सामाजिक सञ्जाल फेसबुकमा लेख्दै गरिब तथा असहायको उपचार गर्ने बताएका हुन । उनले उपचार पाउन सम्बन्धित स्थानीय तह बाट सिफारिस लिएर आउन समेत आग्रह गरेका हुन ।
उनले लेखेका छन्, “नेपालको जुनसुकै पालिकाको भए पनि अशक्त र गरिब नागरिक बिरामीहरूले आफ्नो पालिकाबाट विपन्न, असहायको सिफारिस लिएर काठमाडौँ महानगर आउनुहोला, हामीसँग ४३ अस्पतालका ३२३ बेड आबद्ध छन्, त्यहाँ बिरामीको आवश्यकता अनुसार निःशुल्क उपचार हुनेछ ।”
महानगरका प्रमुख बालेनले निशुल्क उपचार बारे आफ्नो टोल छिमेक वा आफन्तहरूलाई समेत जानकारी दिन आग्रह गरेका छन् । उनले त्यस बारे विस्तृत जानकारीका लागि महानगरपालिकाको स्वास्थ्य विभागको सम्पर्क नं. ११८० मा सम्पर्क गर्न समेत आग्रह गरेका छन् ।