बारामा माध्यमिक शिक्षा परीक्षा (एसईई) को प्रश्नपत्र बाहिरिएको छ । एसईई परिक्षाको आज पहिलो दिन अंग्रेजी विषयको प्रश्नपत्र बाहिरिएको हो ।
जिल्लाको आदर्श कोतवाल गाउँपालिकास्थित महेन्द्र आदर्श जयनगर च्यूटाँहा माध्यमिक विद्यालयस्थित परीक्षा केन्द्रबाट प्रश्नपत्र बाहिरिएको बुझिएको छ । परीक्षा सुरु भएको १५ मिनेटभित्रै प्रश्नपत्र बाहिरिएको स्थानीय सञ्चारमाध्यमले जनाएका छन् ।
परीक्षा केन्द्रका केन्द्राध्यक्षको व्यवस्थापनको कमीले प्रश्नपत्र बाहिरिएको बताइएको छ । प्रश्नपत्रको तस्विर अहिले समाजसञ्जालमा समेत राखिएको छ ।
प्रश्नपत्र बाहिर ल्याएको आरोपमा प्रहरीले एकजनालाई नियन्त्रणमा समेत लिएको छ । महेन्द्र आदर्श जयनगर च्यूटाँहा स्कूलबाटै एकजनालाई प्रहरीले नियन्त्रणमा लिएको बाराका प्रमुख जिल्ला अधिकारी नवराज सापकोटाले जानकारी दिए ।
मोबाइलमा ह्वाट्सएपमा मार्फत पक्राउ परेका व्यक्तिले प्रश्नपत्र बाहिर ल्याएको व्यक्तिलाई नियन्त्रणमा लिएर अनुसन्धान थालिएको सापकोटाले बताए ।
