मुम्बई, ६ साउन । क्यानडामा रहेको कपिल शर्माको क्याफे गोलीबारी भएको १० दिनपछि फेरि खुलेको छ ।
यो क्याफेले सामाजिक सञ्जालवाट जानकारी दिएको छ कि, ‘हामी तपाईलाई फेरि स्वागत गर्न तयार छौं।’ यो क्याफेको उद्घाटन ७ जुलाईमा भएको थियो । त्यसको दुई दिनपछि नै आतंकवादी संगठनले यहाँ ९ राउण्ड फायर गरेको थियो । त्यसयता यो क्याफे बन्द थियो ।
कपिल शर्माको क्याप्स क्याफेको आधिकारिक इन्स्टाग्राम पेजबाट यो घोषणा गरिएको हो । पेजमा सेयर गरिएको तस्विरमा लेखिएको छ, क्याप्स क्याफे आजवाट खुल्दैछ, हामीले तपाईंलाई धेरै सम्झ्यौं र तपाईंको माया र समर्थनको लागि आभारी छौं। हार्दिक धन्यवाद सहित हामी हाम्रा ढोकाहरू पुनः खोल्दै छौं र तपाईंलाई न्यानो, आराम र हेरचाहको साथ स्वागत गर्दैछौं।’
पोष्टमा लेखिएको छ, आज खुल्दैछ । बत्तीहरू बलेका छन्, कफी तातो छ र हाम्रो हृदय भरिएको छ। क्यापको क्याफे खुलेको छ। हामी तपाईलाई हरेक दिन बिहान ८ बजे देखि १० बजे सम्म भेट्नेछौं। त्यहाँ भेटौँला।’
कमेडियन कपिल शर्माले क्यानडाको ब्रिटिश कोलम्बियाको सरेमा क्याफे क्याप्स खोलेका छन् । क्याफेको उद्घाटन ७ जुलाईमा भएको थियो, त्यसको दुई दिनपछि ९ जुलाईमा राति अबेरसम्म आक्रमणकारीले ९ राउण्ड फायर गरेका थिए । यसको भिडियो पनि सार्वजनिक भएको छ ।
कपिलको क्याफेमा भएको हमलाको जिम्मेवारी खालिस्तानी आतंकवादी हरजीत सिंह लाडीले लिएको दाबी मिडिया रिपोर्टले गरेको छ । उनी बब्बर खालसा इन्टरनेशनल (बिकेआई) सँग सम्बन्धित छन्। उनी भारतको राष्ट्रिय अनुसन्धान एजेन्सी (एनआईए) को मोस्ट वान्टेड आतंककारीको सूचीमा छन्।
मिडिया रिपोर्टहरूले दावी गरेका छन् कि हरजीत सिंह लड्डीले कमेडी शोमा निहंग सिखहरू विरुद्ध गरेको टिप्पणीलाई लिएर कपिल शर्माको क्याफेमा गोली चलाएको हो। सामाजिक सञ्जालमा हरजीत सिंह लाडी र तुफान सिंह नामका अर्का व्यक्तिले भिडियोमार्फत कपिल शर्मालाई सार्वजनिक रूपमा माफी माग्न चेतावनी दिएका छन् र माफी नमाग्ने हो भने मामिला बिग्रन सक्ने बताएका छन् ।
उनीहरुले कपिल शर्माका म्यानेजरसँग पटकपटक सम्पर्क गर्ने प्रयास गरेको पनि उनीहरुले बेवास्ता गरेको दाबी गरेका छन् । अन्ततः उनीहरूले कमेडियनको ध्यान आकर्षित गर्न क्याफे बाहिर फायर खोल्नुपरेको दावी गरेका छन् ।
