तेहरान, २३ असार । इजरायल र इरानबीचको युद्धपछि सुरक्षित बंकरमा लुकेर बसेका इरानका सर्वोच्च नेता आयतोल्लाह अली खामेनी अब भने बाहिर आएका छन् ।
एक धार्मिक कार्यक्रममा उनी सार्वजनिक रूपमा देखा परे। यो जानकारी इरानको सरकारी मिडियाले दिएको हो ।
इरानी सरकारी टेलिभिजनमा प्रसारित भिडियोमा खामेनीले मस्जिदमा मानिसहरूलाई अभिवादन गर्दै र उनीहरूलाई खुशी पारेको देखाइएको छ। यो अवसर नमाजी इमाम हुसैनको शहीद दिवस मनाउने क्रममा थियो। शिया मुस्लिमहरुको लागि यो महत्वपूर्ण दिन हो ।
सामाजिक सञ्जालमा भाइरल भइरहेको भिडियोमा कालो कपडामा खामेनीलाई देख्न सकिन्छ भने उनको अगाडि उभिएको भीडले ‘हाम्रो नेताका लागि हाम्रो नसामा रगत छ’ भन्दै नारा लगाएको देखिन्छ । सरकारी टिभीले उक्त क्लिप मध्य तेहरानस्थित इमाम खोमेनी मस्जिदको रहेको बताएको छ।
सन् १९८९ देखि इरानमा शासन गरेका खामेनी जुन १३ मा इजरायली हवाई हमलापछि सार्वजनिक रूपमा देखा परेका थिएनन्। गत साता पूर्व रेकर्ड गरिएको भिडियो सार्वजनिक भएको थियो, जसमा उनी देखिएका थिए। संसदका सदस्यहरूसँग भेट्दा उनी सार्वजनिक रूपमा देखिएका थिए ।
इरानलाई आणविक शक्ति बन्नबाट रोक्न इजरायल र अमेरिकाले चर्को हमला गरे पछि इरानले पनि जवाफी हमला गरी जवाफ दिएको थियो । इजरायलले इरान आणविक परीक्षणको धेरै नजिक पुगेको दाबी गरेको छ । जसका कारण उनको देश खतरामा परेको थियो र यही कारणले उसले इरानमाथि आक्रमण गरेको थियो ।
इरानी प्रशासनले यी आक्रमणमा ९०० भन्दा बढी व्यक्तिको मृत्यु भएको जनाएको छ भने उता इरानको आक्रमणमा कम्तीमा २८ इजरायली व्यक्तिको मृत्यु भएको थियो।
