बारा । जिल्ला समन्वय समिति बाराको निर्वाचन यही जेठ ३० गते हुने भएको छ । मुख्य निर्वाचन अधिकृतको कार्यालयले आज एक सूचना जारी गर्दै समन्वय समिति को निर्वाचन को कार्यतालिका सार्वजनिक गरेको हो । मुख्य निर्वाचन अधिकृत को कार्यालय ले जारी गरेको कार्यतालिकाअनुसार जेठ २६ गते मतदाता नामावली प्रकाशन, मतदाता नामावली सच्याउन वा छुट नाम समावेश गर्ने, संशोधित मतदाता नामावली प्रकाशन गर्ने, मतदाताको विरोधमा उजुरी दिने रहेको छ । यस्तै २७ गते मतदाताको विरोधमा दिएको उजुरीउपर जाँचबुझ गर्ने, अन्तिम नामावली प्रकाशन गर्ने उल्लेख छ ।
त्यस्तै जेठ २८ गते उम्मेदवार को मनोनयन पत्र दर्ता गर्ने , उम्मेदवारको सूची प्रकाशन, उम्मेदवारको विरोधमा उजुरी, मनोनयनपत्र जाँच र उजुरीउपर निर्णय, उम्मेदवारको नामावली प्रकाशन, उम्मेदवारको नाम फिर्ता र अन्तिम नामावली प्रकाशन गर्ने रहेको छ ।जेठ २९ गते उम्मेदवारलाई निर्वाचन चिह्न प्रदान गरिने छ । जेठ ३० गते बिहान ८ बजेदेखि १२ बजेसम्म मतदानको कार्यक्रम रहेको मुख्य निर्वाचन अधिकृतको कार्यालयले जनाएको छ । मतदान लगत्तै मतगणना र अन्तिम परिणाम घोषणा गरिने छ ।